धरान । राष्ट्रिय परीक्षा बोर्डको बुधबार बसेको बैठकले माध्यमिक शिक्षा परीक्षा (एसईई) वैशाखको पहिलो सातामा गर्ने निर्णय गरेको छ ।
बोर्डका अनुसार वैशाख ९ गतेबाट परीक्षा सञ्चालन गर्ने गरी निर्णय गरिएको हो । २० गतेसम्म हुन लागेको परीक्षाको समय तालिका भने आज (बिहीबार) को गोरखापत्र र बोर्डको बेवसाइटमा सार्वजनिक गरिने जनाइएको छ ।
सरकारले हालै स्थानीय तहको निर्वाचनको मिति सार्वजनिक गरेसँगै बोर्डले निर्वाचनको मिति र परीक्षाको मितिबीच तालमेल मिलाएको हो ।
बोर्डका अध्यक्ष महाश्रम शर्माका अनुसार निर्वाचनको मिति निर्धारित भएका कारण परीक्षाको मिति तय गरिएको हो । वैशाखभित्रै परीक्षा गर्ने पक्षमा बोर्ड देखिएको थियो ।
तर, निर्वाचन गर्ने नगर्नेबीचको अन्यौलले गर्दा नै मिति तय हुन नसकेको उनले बताए । विद्यार्थीहरूलाई कम्तीमा पनि दुई महिना पढ्ने समय दिएर परीक्षाको समय तालिका सार्वजनिक गरिएको हो ।
