सम्पर्क विहिन भएकाे तारा एयरको टुइनअटर नाइन एनएइटी जहाज दुर्घटनाग्रस्त अवस्थामा भेटिएको नेपाली सेनाले जनाएकाे छ ।
मुस्ताङको खासाङ– २ लांकेकोला भन्ने ठाउँमा जहाज दुर्घटनाग्रस्त अवस्थामा भेटिएको मध्य कमाण्ड पोखराका कमाण्ड सेनापति बाबुराम श्रेष्ठले बताएका छन् । उनका अनुसार विमानमा अहिले पनि आगो लागिरहेको छ ।
पोखराबाट स्थानीय समयअनुसार बिहान ९ः५५ बजे जोमसोमका लागि १९ यात्रु र तीन चालक दलका सदस्यसहित उडेको उक्त जहाज अन्तिम पटक जोमसोम टावरसँग १०ः७ बजे घोडेपानी भन्ने स्थानमा सम्पर्कमा आएको र सोपश्चात् उक्त जहाज सम्पर्कविहीन भएको थियाे ।
सम्पर्क विहिन जहाज खोजतलासका लागि फिस्टेल एयरको हेलिकप्टरलाई पठाइएकामा प्रतिकूल मौसमका कारण उक्त हेलिकप्टर पुनःजोमसोम नै फर्किएएपछि स्थलमार्गबाट खोजीकार्य गर्न नेपाली सेना र नेपाल प्रहरीसमेत खटिएकाे थियाे ।
