पथरीशनिश्चरे । मोरङको पथरीशनिश्चरेमा ‘जीवनका लागि विश्वव्यापी अनुकूल वातावरण’ शीर्षकमा शनिबार १ नम्बर प्रदेशस्तरीय आइएमई अन्तरविद्यालय चित्रकला प्रतियोगितमा धरानको पब्लिक हाईस्कुलका रूपक राई प्रथम बनेका छन् ।
एभरेष्ट आर्ट फ्यूजनको आयोजनामा भएको प्रतियोगितामा इस्ट होराइजन अङ्ग्रेजी विद्यालय मेचीनगर झापाका अभिषेक प्रधान द्वितीय र सोही विद्यालयका सलेस राजवंशी तृतीय भएका छन् ।
ब्लू हेभन इजुकेसन फाउन्डेसन अर्जुनधारा झापाका सजल मगर र पथरीशनिश्चरेस्थित एभरेष्ट बोर्डिङकी सजु ओख्राबुले सान्त्वना पुरस्कार प्राप्त गरेका छन् । प्रथम, द्वितीय र तृतीयले क्रमशः नगद २५ हजार, २० हजार र १५ हजार पुरस्कार तथा सान्त्वनाले पञ्चायत माविमा सञ्चालित फाइन आर्टमा अध्ययनका लागि कक्षा ११ र १२ का लागि ५० प्रतिशत छात्रवृत्ति प्राप्त गरेका छन् ।
एसईई परीक्षा दिएर बसेका विद्यार्थीलाई लक्षित गर्दै प्रतियोगिता आयोजना गरिएको हो । कार्यक्रममा पथरीशनिश्चरेका नगर प्रमुख मोहनप्रसाद तुम्वापोले विजेता विद्यार्थीहरूलाई पुरस्कार वितरण गरे ।
