भोजपुरः भोजपुरको हतुवागढी गाउँपालिका ८ का वडाध्यक्ष प्रेम बहादुर थापाले ३ वटा विद्यालयका विद्यर्थीलाई निःशुल्क पोसाक वितरण गरेका छन् । वडाध्यक्ष थापाले आफ्नै वडाका ३ वटा प्राथमिक विद्यालयका विद्यार्थीहरुलाई निः शुल्क बिद्यालय पोसाक वितरण गरेका हुन् ।
थापाले वडा नम्बर ८ मा रहेका विद्यापोखरी प्रा वि डाडाँखर्क , सिंहदेवी प्रा वि बारीगाउँ र शिक्षा प्रकाश प्रा वि पिचाखामा अध्ययनरत छात्र छात्रालाई पोसाक दिएको हतुवागढीका स्थानीय एलबी प्रधानले बताए । सबै विद्यार्थी विद्यालय पोसाकमै विद्यालय आउन भन्ने उद्देश्यले एक सय जना विद्यार्थीलाई पोसाक वितरण गरेको अध्यक्ष थापाको भनाई छ ।
वितरण गरिएको पोसाकको गुणस्तर पहिलेको भन्दा राम्रो रहेको पनि उनले बताए । उनले ३ वटै विद्यालयसँग छलफल गरेर पोसाकमा एकरुपता समेत ल्याएको शिक्षा प्रकाश प्रा वि की प्रधानाध्यापक नेपालमाया राईले जानकारी दिइन ।
पोसाकमा ६५ हजार खर्च गरेका अध्यक्ष थापाले केही दिनमा सबै विद्यार्थीका लागि टाई र बेल्टको पनि व्यवस्था गर्ने बताए । निःशुल्क पोसाक पाए पछि विद्यार्थी र अभिभावक खुसी भएका छन् । थापा स्थानीय तह निर्वाचनमा नेपाली काँग्रेसबाट वडाध्यक्षमा निर्वाचित भएका हुन् ।
