धरान । धरान–धनकुटा सडक– खण्डस्थित साँगुरीगढी गाउँपालिका–६ को कोलबोटेमा शनिबार बिहान स्कुल बस दुर्घटना हुँदा ६ जना घाइते भएका छन् ।
इलामको माई नगरपालिका–४ स्थित गरुवा आधारभूत विद्यालयका विद्यार्थी र शिक्षक चढेको बस दुर्घटनामा परेको हो । इलामबाट वनभोजका लागि नमस्ते झरनातर्फ जाने क्रममा मे.१ ख ३३८० नम्बरको बस ब्रेकफेल भई दुर्घटनामा परेको प्रहरीले जनाएको छ । दुर्घटनामा शिक्षकहरू रामबहादुर मगर र पवित्रा राई तथा विद्यार्थीहरू शान्ति लिम्बू, सीमा राई, मनिका राई र निस्मा सारु मगर घाइते भएका छन् ।
घाइतेहरूलाई प्रहरीले उद्धार गरी धरानस्थित बीपी कोइराला स्वास्थ्य विज्ञान प्रतिष्ठानमा उपचारका लागि पठाइएको इलाका प्रहरी कार्यालय भेडेटारले जनाएको छ । घाइतेमध्ये शान्तिको अवस्था गम्भीर रहेको र अन्यको सामान्य रहेको बताइएको छ । उक्त बसमा ५५ जना सवार थिए ।
