धरान । चिया बगानमा काम गर्ने श्रमिकहरूको न्यूनतम् ज्याला अन्य श्रमिकहरू समान हुनुपर्ने मागसहित नेपाल ट्रेड युनियन महासङ्घ जिफन्ट कोशी प्रदेश कमिटीले मुख्यमन्त्रीलाई ध्यानाकर्षण पत्र बुझाएको छ ।
अन्य श्रमिकहरूको दैनिक ज्याला ६ सय ६८ रहेको भए पनि चिया तथा कफी बगानमा काम गर्ने श्रमिकहरूलाई ५ सय मात्रै तोकिँदा श्रमिकहरूमाथि विभेद भएको भन्दै समान ज्याला कायम गरिनु पर्ने र श्रम कानून कार्यान्वयनका लागि हरेक प्रतिष्ठानमा श्रम सम्बन्ध समिति गठन गराइनु पर्ने मागसहित मुख्यमन्त्री हिक्मतकुमार कार्कीलाई सोमबार ज्ञापन पत्र बुझाइएको हो ।
सरकारले सबै श्रमिकहरूका लागि योगदानमा आधारित सामाजिक सुरक्षा कार्यान्वयनमा लगेको भए पनि बगान क्षेत्रमा काम गर्ने श्रमिकहरूलाई उक्त कोषमा सहभागी नगराएका कारण वर्षौंदेखि बगानमा जीवन अर्पण गरेका श्रमिकहरू समस्यामा परेको जिफन्ट राष्ट्रिय कमिटी सदस्य तथा मजदुर नेता भीमज्वाला राईले बताए । चिया तथा कफी उत्पादन प्रशोधन गर्ने उद्योग र यससँग सम्बन्धित काममा कार्यरत सबै प्रकारका श्रमिकलाई सामाजिक सुरक्षा कोषमा सूचीकरण गर्न प्रदेश सरकारले आवश्यक पहलकदमीका लागि माग गरिएको उनले बताए ।
ध्यानाकर्षण पत्रमा सरकारले तोकेको न्यूनतम् ज्यालाभन्दा कम नहुने गरी स्थानीय सरकारले ज्याला निर्धारण गर्न सक्ने स्थानीय सरकार सञ्चालन ऐन २०७४ ले व्यवस्था गरे बमोजिम श्रमिकहरूको पञ्जीकरण र कानून कार्यान्वयन गर्न प्रदेशभरिका सबै पालिकाहरूमा श्रम डेस्कको व्यवस्था गरी श्रमिकहरुरूको तत्काल पञ्जीकरण गर्न माग गरिएको छ ।
जिफन्ट आबद्ध चिया कफी श्रमिक युनियन नेपालको प्रतिनिधित्व गर्दै जिफन्ट राष्ट्रिय कमिटी सदस्य भीमज्वाला राई, जिफन्ट कोशी प्रदेश अध्यक्ष किशोर धमला, नेपाल यातायात स्वतन्त्र मजदुर सङ्गठन मोरङ अध्यक्ष उत्तम बन्जारा, जिल्ला सदस्य विकास ढुङ्गेललगायतको उपस्थितिमा मुख्यमन्त्री कार्कीलाई ज्ञापन–पत्र बुझाइएको हो ।
ज्ञापन–पत्र ग्रहरण गर्दै मुख्यमन्त्री कार्कीले चिया तथा कफी क्षेत्रको प्रबर्धन र विकासका लागि कोशी प्रदेश सरकारले विशेष योजना बनाएको बताए । सय वर्ष इतिहास बोकेको चिया बगान क्षेत्रका श्रमिकहरूमाथिको यो विभेदका कारणहरू पनि खोजी यही योजनाभित्र अवश्य समेटिने र क्रमिक सुधार गर्दै श्रमिकहरूको जीवनसँंग मेल खाने गरी सुधार गरिने उनले बताए ।
