नुवाकोट/ नुवाकोटको विभिन्न स्थानका व्यक्तिसँग रकम ठगी गरेको अभियोगमा प्रहरीले सिन्धुपाल्चोक बतासेका ज्याम्बल तामाङलाई आज पक्राउ गरेको छ ।
नुवाकोट दाङसिंहका तीन महिलासँग ठमेल व्यापार सङ्घको सदस्य बनाइदिने र त्यसबाट राम्रो कमाई हुने प्रलोभन दिएर २६ लाख ६४ हजार ठगी गरेको उजुरीका आधारमा तामाङलाई प्रक्राउ गरी अनुसन्धान सुरु गरिएको प्रहरी निरीक्षक जितेन्द्र बस्नेतले जानकारी दिए ।
“गाउँका सोझासिधा महिलालाई व्यापार सङ्घको सदस्य बनाइदिने र विदेश सामाग्रीको बिक्री गरी दुई वर्षमा दोब्बर रकम कमाई हुने भन्दै पैसा उठाएको पाइयो” प्रहरी निरीक्षक बस्नेतले भने ।
पक्राउ परेका तामाङले प्रहरीसमक्ष दाङसिङका माहिली तामाङसँग १० लाख ६४ हजार, सिर्जना लामासँग ६ लाख ५० हजार र भीममाया तामाङसँग ९ लाख ४० हजार लिएको स्वीकारेका छन् ।
तामाङलाई प्रक्राउ गरेपछि दाङसिंहसहित अन्य स्थानबाट आफूलाई पनि ठगी गरेको भनी उजुरीहरू आइरहेकाले के कति जनासँग कति रकम ठगी गरेको भनी अनुसन्धान जारी रहेको प्रहरीले जनाएको छ ।
सिन्धुपाल्चोकको साविकको बतासे–८ का लामा ‘सेते कुमार’को नामबाट नुवाकोटमा धामीझाँक्री पेसा गर्दै आएका थिए ।
