धरान/सरकारले आर्थिक वर्ष २०७४/७५ को नीति तथा कार्यक्रम पारित गरेको छ । प्रधानमन्त्रीे निवास बालुवाटारमा आज बिहान बसेको मन्त्रिपरिषद्को बैठकले सो नीति तथा कार्यक्रम पारित गरेको हो । नीति तथा कार्यक्रम आज बेलुका नै राष्ट्रपति विद्यादेवी भण्डारी समक्ष पेस गर्ने समेत मन्त्रिपरिषद्ले निर्णय गरेको छ ।
“नीति तथा कार्यक्रममा राष्ट्रिय महत्वका सबै ठूला परियोजना समावेश गर्नुका साथै स्थानीय तहको निर्वाचन सम्पन्न गर्न र अरू दैनिक कामका लागि बजेट छुट्याइन्छ”, सूचना तथा सञ्चारमन्त्री सुरेन्द्रकुमार कार्कीले बताउनुुभयो ।
आंशिक बजेटअन्तर्गतको सो नीति तथा कार्यक्रम यही जेठ १० गतेभित्र नै राष्ट्रपति भण्डारीले व्यवस्थापिका–संसद्मा पेस गर्नुहुने मन्त्री कार्कीको भनाइ छ ।
सरकारका प्रवक्ता कार्कीले नीति तथा कार्यक्रम संविधान कार्यान्वयनका साथै राष्ट्रिय परियोजना र राष्ट्रिय पुनः संरचनालाई तीव्रता दिनेतर्फ केन्द्रित रहेको जानकारी दिनुभयो । “बजेटबारेमा नेकपा (एमाले) लगायत प्रतिपक्ष दलका केही असहमति छन्,उहाँले भन्नुभयो–“हामी त्यस बारेमा निरन्तर अन्तरसंवादमा छौँ, हिजो (शनिवार) मात्रै तीन प्रमुख दल बीचमा छलफल भएको छ, छलफल सकारात्मक रूपमा अगाडि बढिरहेको छ ।”
रासस
