धरान/धरान–१७ मा जारी ‘छैठौं सुनौलो अन्तर चोक स्तरीय टुनामेन्ट’ मा नमस्ते चोक, बगान टोल र बीचघोपा विजयी बन्दै दोस्रो चरणमा प्रवेश गरेका छन् । सुनौलो पुस्तकालयको आयोजनामा भइरहेको मंगलबारको खेलमा नमस्तेले पटनालीलाई ५–० गोल अन्तरले पराजित गरेको छ । सोमबार बीचघोपाले फोकल्याण्डलाई ३–२ गोल अन्तरले पराजित गरेको छ । त्यस्तै आइतबारको उद्घाटन खेलमा बगान टोलले सरस्वती टोललाई २–० गोलले हराएको थियो । १४ वटा टीम सहभागी रहेको प्रतियोगिताको फाइनल असोज ७ गते हुँदै छ । विजेताले १५ हजार र उपविजेताले १० हजार रुपैयासहित ट्रफी, मेडल र प्रमाण पत्र पाउने उपाध्यक्ष सुवास राईले बताए । त्यस्तै युवा संघ नेपाल धरान ११ नम्बर कमिटीको आयोजनामा जारी वडाअध्यक्ष टोल कप अन्तर्गत मंगलबारको खेलहरुमा मकालु चोक र मंगलबारे ए विजयी बनेका छन् । मकालुले मंगलबारे बिलाई ३–२ गोल अन्तरले पराजित गरेको छ । खेलको म्यान अफ दि म्याच मकालुका मिलन लिम्बू घोषित भए । त्यस्तै दोस्रो खेलमा मंगलबार ए ले सयपत्री चोकलाई २–० गोल अन्तरले पराजित गर्दा खेलको म्यान अफ दि म्याच मंगलबारेका मनोज लिम्बू घोषित भए । बुधबारको पहिलो खेल सिर्जना चोक र शिवजी चोक साथै दोस्रो खेल चाँदनीचोक र विष्णु चोकबीच हुने सुरज लामाले बताए ।