धरान/पूर्वाञ्चल सिङ्गिङ स्टार पाँचौं सस्करणको १० जिल्लाको अडिसन पूरा भएको छ । जसबाट १२७ जना प्रतियोगीहरु दोस्रो चरणमा प्रवेश गरेका छन् । बगिना कला केन्द्र सुनसरीको आयोजनामा जारी अडिसन अव उदयपुर, ओखलढुङ्गा, सोलुखुम्बू र सुनसरीको मात्रै हुन बाँकी छ । अन्य जिल्लाको पूरा भइसकेको छ । प्रदेश नम्बर एकमा रहेका १४ जिल्लामा अडिसन लिइरहेको छ । प्रदेश स्तरीय अडिसनबाट २ सयजना जति छनौट गर्ने तयारी रहेको छ । पहिलो चरणको अडिसनको अन्तिम अडिसन धरानमा असोज ३१ गते हुँने केन्द्रका अध्यक्ष एवम् कार्यक्रम संयोजक भक्तिराज राईले जानकारी दिए । उनका अनुसार हालसम्म ताप्लेजुङ, पाँचथर, इलाम, झापा, मोरङ, धनकुटा, तेह्रथुम, भोजपुर, खोटाङ र संखुवासभाको अडिसन सम्पन्न भइसकेको छ । अडिसनबाट छनौट भएकाहरुलाई दोस्रो चरणको अडिसन धरानमा लिइने छ । फाइनलसम्म १४ जिल्लाबाट एक–एक जना स्पर्धीहरु फाइलन राउण्डमा प्रवेश पाउने छन् । त्यसबीचमा हरेक जिल्लागत राउण्डहरु गरिँदै फाइलन राउण्ड पु¥याउने संयोजक राईले बताए । फाइनल विजेताले यसपटक ५० हजार रुपैया नगदसहित प्लस टुसम्मको छात्रवृति, गायनको मौकालगायत प्राप्त गर्ने छ । त्यस्तै दोस्रोले २५ हजार रुपैया, तेस्रोले नगद १५ हजार रुपैयासहित विभिन्न सामग्रीहरु प्राप्त गर्ने छ । फाइनल माघको दोस्रो साता धरानमा गरिदै छ । ‘प्रतिभा गायन, खोजी हाम्रो अभियान’ नाराका साथ सुरु भइरहेको प्रतियोगिताले प्रदेश १ का सबै जिल्लाहरुमा अडिसन लिइरहेको छ । ‘गाउँ गाउँमा लुकेका प्रतिभाहरु खोज्ने हाम्रो अभियान हो ।’ गायकसमेत रहेका राईले भने, ‘अहिलेसम्मको चारवटा स्टारमा पहाडी क्षेत्रका नवप्रतिभाहरुले नै जितिरहेका छन् ।’