धरान/धरान–५ स्थित ठिंगाबारीका सुकबहादुर सम्बाहाम्फे लिम्बूको घरमा अज्ञात समूहले बिहीबार राति ढुंगा प्रहार गरी क्षति पु¥याएका छन् । ढुंगा प्रहारबाट माथिल्लो तलाको झ्यालको सिसा फुटेको पीडित लिम्बूले बताएका छन् । तर्साउने नियतले ढुंगा प्रहार गरेको हुन सक्ने पीडित लिम्बूले बताए । उनी एमालेका सक्रिय कार्यकर्ता हुन् । उनले आफ्नो घरमा विपक्षी पार्टीका युवाहरुले ढुंगा प्रहार गरेको हुन सक्ने बताए । ‘हिजो भोटमा पार्टीलाई सहयोग गरेको थिएँ । त्यही कारण विपक्षी पार्टीका युवाहरुले ढुंगा हानेको हुन सक्छ ।’ उनले फोनमा भने । उनका अनुसार करिव रातको ९ बजेतिर ढुंगा प्रहार गरेर युवाहरु भागेका थिए । उक्त झ्याल भएको कोठामा बुबा सुतेको भए पनि चोटपटक नलागेको उनले बताए । ढुंगा प्रहार गरेर आतंकित बनाएको भन्दै उनले देउराली अस्थायी प्रहरी चौकीमा शुक्रबार निवेदन दिएका छन् । निवेदनपछि चौकीका प्रमुख असई घनस्याम मण्डलले के भएको हो भनेर गस्ती टोलीलाई बुझ्न पठाएको बताए । उनले घटनाको छानविनपछि आक्रमणमा संलग्न युवाहरुको खोजी गरिने बताए ।