प्रदेश १ को राजधानी गोठगाउँ बनाउनु पर्ने माग गर्दै र्याली

विराटचौक/प्रदेश १ को राजधानी माग गर्दै सुन्दरहरैचाबासी आन्दोलित बनेका छन् । सुन्दरहरैचाको गोठगाउँलाई प्रदेश १ को राजधानी बनाउनु पर्ने माग राख्दै शनिबार हजारौंको संख्यामा मोटरसाइकल र्याली निकालेका छन् । गोठगाउँस्थित पूर्वाञ्चल विश्वविद्यालय परिषर राजधानीको लागि पूर्वाधार पुग्ने स्थानीयबासीले बताएका छन् । सुन्दरहरैचाका नगर प्रमुख शिवप्रसाद ढकालले सबैले आ–आफ्नो ठाउँबाट पहल गर्नको लागि स्थानीयबासीहरुलाई आग्रह गरे । मोरङ क्षेत्र नम्बर ३ बाट निर्वाचित सांसद भानुभक्त ढकालले पनि गोठगाउँ प्रदेश १ को राजधानीको लागि उपयुक्त भएको बताएका छन् । पूर्वाञ्चल विश्वविद्यालयमा करिव ८०५ विगाहा क्षेत्रफल जग्गा रहेकाले पनि सबै भौतिक पूर्वाधार पुग्ने सुन्दरहरैचावासीको दाबी छ । यस विषयमा नगरपालिकाले शहरी विकास मन्त्राल, प्रधानमन्त्री तथा मन्त्रीपरिषद्को कार्यालयलाई जानकारीसमेत पठाइसकेको छ । तर, चलखेल गर्दै अन्यत्र लान लागेको भन्दै सुन्दरहरैचावासी आन्दोलित बनेका हुन् ।