सलमान खान यस वर्ष दोस्रो फिल्म लिएर आउँदैछन् । उनको पहिलो फिल्म 'ट्यूबलाइट' जूनमा प्रदर्शनमा आएको थियो । अब बलिउडका सुल्तान ‘टाइगर जिन्दा हे’बाट फेरि पर्दामा फर्किएका छन् । यो सिक्वेल यस वर्षको सबैभन्दा हिट सावित हुने विश्लेषकहरु बताउँछन् । फिल्म २२ डिसेम्बरमा रिलिज हुँदैछ ।
सलमान र कटरीना स्टारर ‘टाइगर जिन्दा हे’को एडभान्स बुकिङ सुरु भएको छ । फिल्म क्रिटिक तरण आदर्शले ट्विटरमा लेखेका छन्, ‘‘टाइगर जिन्दा हे’को धमाका सुरु भएको छ । फिल्मको एडभान्स बुकिङ सुरु भएको छ ।’ नेपालमा पनि मंगलवारबाट फिल्मको एडभान्स बुकिङ ओपन भइसकेको छ ।
सलमानको फिल्म र ईदको सार्वजनिक विदा भएका कारण मल्टिप्लेक्सका मालिकहरुले टिकटको मूल्य ह्वात्तै बढाएका छन् । धेरै सिनेमाघरमा फिल्मको टिकट मूल्य १ हजारदेखि २५ सयसम्म छ । फिल्मको न्यूनतम टिकट मूल्य २ सय रहेको छ ।
अलि अब्बास जफार निर्देशित ‘टाइगर जिन्दा है’लाई आदित्य चोपडाले निर्माण गरेका हुन् । यो फिल्म २०१२ मा रिलिज भएको कबीर खान निर्देशित सुपरहिट फिल्म 'एक था टाइगर'को सिक्वेल हो । यो फिल्मको तेस्रो सिक्वेलको समेत घोषणा भइसकेको छ ।
