निर्देशक बसन्त निरौला निर्देशित नयाँ फिल्म ‘होलिडे’को छायांकनका केही रमाइला तस्बिरहरु सार्वजनिक गरिएको छ । यूरोपका विभिन्न रमणिय स्थानमा खिचिएका फिल्मका तस्बिरहरु सार्वजनिक गरेसँगै यसको निर्माणपक्षले प्रचार आरम्भ गरेको हो ।
कमेडी ड्रामा जनरामा बनेको ‘होलिडे’मा गौरव पहारी, पबित्रा आचार्य, वुद्दि तामाङ, श्याम श्रेष्ठ, बेनि ढुंगाना लगायतका कलाकारहरुको अभिनय रहेको छ । यो फिल्ममा पहिलो पटक नायिका आचार्यले सोलो अभिनय गरेकी छन् ।
फिल्मको छायांकनका लागि ९ जनाको टोली यूरोप पुगेको थियो । यूरोप छायांकनको व्यवस्थापनको जिम्मा श्याम श्रेष्ठले गरेका थिए । फिल्मलाई अभिमन्यू निरबीले लेखेका छन् भने युवराज चौलागाईं र अमीत श्रेष्ठको संगीत रहेको छ । यूरोप, फ्रान्स, बेल्जियम, लग्जम्बर्ग लगायतका मुलुकमा फिल्मको छायांकन गरिएको हो ।
बि.एन. फिल्मसको ब्यानरमा बनेको यो फिल्मका निर्माताहरु मन्दिरा श्रेष्ठ, तेजेन्द्र कँडेल, र हरि कार्की हुन् । यस्तै, दिनेश कालिराज कार्यकारी निर्माता हुन् । फिल्मको प्रदर्शन मिति तय गरिएको छैन ।
