स्वस्तिमा खड्का नेपाली फिल्म उद्योगका पछिल्लो पुस्ताकी चर्चाकी अभिनेत्रीमा गनिन्छिन् । पछिल्लो पटक फिल्म ‘छक्का पञ्जा २’मा लिड रोलमा काम गरेकी ‘होस्टेल रिटर्न्स’ डेब्यू गर्ल ‘दुई रुपैयाँ’ फिल्मको ‘कुटुमा कुटु’ गीतको नृत्यबाट थप ‘लाइमलाईट’मा छिन् । युवा निर्देशक निश्चल बस्नेतसँगको बैवाहिक सम्बन्धपछि चर्चामा आएकी यी अभिनेत्री हालै नयाँ प्रोजेक्टमा अनुबन्ध भएको खबर बाहिर आएको छ ।
निर्माता, निर्देशक तथा कलाकार अशोक शर्माको निर्माण निर्देशनमा बन्ने ‘अनटाइटल’ फिल्ममा स्वस्तिमा आवद्ध भएकी हुन् । प्राप्त जानकारी अनुसार उक्त प्रोजेक्टको लागी सुरुमा ‘ड्रिम्स’ डेब्यू गर्ल साम्राज्ञी राज्यलक्ष्मी शाहलाई अफर गरिएको थियो । तर फिल्मको कथावस्तुमा अभिनेत्री गाउँले भेषमा प्रस्तुत हुनपर्ने देखिएपछि साम्राज्ञीले अस्विकार गरेकी थिइन् ।
त्यसपछि स्वस्तिमाले साम्राज्ञीको स्पेस लिएको श्रोत बताउँछ । फिल्म फ्लोरमा जाने मिति बाहिर ल्याइएको छैन् । तथापी निर्माण टिमले अर्को बर्षको बडा दशैँको अबसरमा फिल्म रिलिज गर्ने निर्णय गरिसकेको छ । फिल्मको कथा खगेन्द्र लामिछानेले लेखेका छन् ।
खगेन्द्र यो फिल्ममा लिड अभिनयमा पनि रहनेछन् भने खगेन्द्र र स्वस्तिमासँगै सौगात मल्ल मुख्य भुमिकामा रहने तय भइसकेको बताइएको छ ।,
