दोस्रो हप्तामा ‘कृ’, रिलिज भयो ‘उकालीमा पछि-पछि’ गीत

आज शुक्रवारबाट दोस्रो हप्तामा प्रदर्शन सुरु गरेको यवा स्टार अनमोल केसी अभिनीत फिल्म ‘कृ’ को नयाँ गीत रिलिज भएको छ । पहिलो हप्ताबाट सफलतापूर्वक दोस्रो हप्तामा प्रदर्शन सुरु गरेको अवसरमा निर्माण यूनिटले फिल्मको ‘उकालीमा पछि-पछि’ बोलको गीत सार्वजनिक गरेको हो ।

अल्मोडा राना उप्रेतीको शब्द, संगीत र स्वर रहेको गीतमा अनमोल र नायिका अदिती बुढाथोकी फिचरिङ छन् । गीतमा अनमोल रिसाएकी अदितीलाई फकाइरहेको देख्न सकिन्छ । फिल्ममा निकै रुचाइएको यो गीत युट्युबमा हेर्न दर्शकहरु निकै आतुर थिए ।

प्रदर्शनको ६ दिनमा ५ करोड ग्रस विजनेश गरेको ‘कृ’ ले दोस्रो हप्तामा ७० बढी हल पाएको निर्माता सुवास गिरी बताउँछन् । उनका अनुसार, दोस्रो हप्ताबाट फिल्म गर्ने विजनेश अब मुनाफा हुनेछ । फिल्मका निर्देशक सुरेन्द्र पौडेल हुन् ।

सुवास इन्टरटेन्मेन्टको ब्यानरमा तयार भएको फिल्मको प्रस्तुतकर्ता द सुपर काजोल फिल्मस् हो । फिल्ममा सुवास गिरी र भूवन केसीको लगानी छ । कमल गिरी कार्यकारी निर्माता रहेको फिल्मका सह–निर्माता श्री पराजुली हुन् ।

‘कृ’ मा अनमोल केसी, अदिती बुढाथोकी, अनुप विक्रम शाही, कामेश्वर चौरासिया, सरोज खनाल, लक्ष्मी गिरी, रुपा राना लगायतका कलाकारको मुख्य भूमिका छ ।