पाँचथर । अपहरण तथा शरीर बन्धक र सार्वजनिक अपराध मुद्दाका दुईजना फरार अभियुक्तलाई पाँचथर प्रहरीले पक्राउ गरेको छ । पक्राउ पर्नेमा फाल्गुनन्द गाउँपालिका–५ का २१ वर्षीय रिसन चेम्जोङ र फिदिम–२ का २७ वर्षीय विशाल श्रेष्ठ रहेका छन् । पक्राउ परेकामध्ये चेम्जोङ अपहरण तथा शरीर बन्धक मुद्दामा अदालतले दोषी ठहर गरेको थियो । निजमाथि अदालतले चार वर्ष कैद र ३० हजार रुपैयाँ जरिवाना तोकेको थियो । उनी कैद भुक्तानका लागि कारागार चलान भएको पाँचथर प्रहरीले जनाएको छ । सार्वजनिक अपराध मुद्दामा अदालतले पाँच हजार रुपैयाँ जरिवाना तोकेका श्रेष्ठ भने जरिवाना रकम बुझाई सफाइ पाएको पाँचथर प्रहरी प्रमुख डिएसपी बामदेव गौतमले बताए ।