धनकुटा । धनकुटाको पाख्रीबास नगरपालिका वडा नं. ४ स्थित एक घरमा तास खेलिरहेको अवस्थामा शनिबार ८ जना पक्राउ परेका छन् । स्थानीय छिरिङ शेर्पाको घरमा तास खेलिरहेको अवस्थामा घरधनी शेर्पासहित पाख्रीबास नगरपालिका–३ का रमेशबहादुर बस्नेत, नगेन्द्र बस्नेत र थर बहादुर कटुवाल, पाख्रीबास नगरपालिका–४ का राजेन्द्र खनाल र शेरबहादुर थापा, धनकुटाको छथर जोरपाटी गाउँपालिका–१ का वीरबहादुर लिम्बू र इलाम फाकफोक गाउँपालिकाका हरिप्रसाद लिम्बूलाई प्रहरीले रङ्गेहात पक्राउ गरेको हो । विशेष सुराकीको आधारमा उक्त स्थानमा खटिएको प्रहरी टोलीले शेर्पाको घरमा तास खेलिरहेको अवस्थामा उनीहरुलाई नियन्त्रणमा लिएको हो । तासको खालबाट तीन बुङ ताससहित तास खेल्ने व्यक्तिहरुको साथबाट नगद २ हजार ५ सय ५० रुपैयाँ बरामद गरिएको जिल्ला प्रहरी कार्यालयका सूचना अधिकारी डिएसपी उमेश लम्सालले जानकारी दिएका छन् । पक्राउ परेका आठै जनालाई जुवा ऐन २०२० अन्तर्गत मुद्दा चलाउने तयारी भइरहेको डिएसपी लम्सालले ब्लाष्टलाई बताएका छन् ।
