पथरीशनिश्चरे/ मोरङको पथरीशनिश्चरे नगरपालिका वडा नम्वर ७ स्थित जनप्रीय चौकका ८१ बर्षिय बृद्धमाथि खुकुरी प्रहार भएको छ ।
स्थानीय बृद्ध जनक राईमाथी सोमबार विहानको राति २ बजेको समयमा आफ्नै घरको शौचालय जाने क्रममा सोही स्थान बस्ने १७ बर्षिय सागर राई लगायतका युवाहरुले खुकुरी प्रहार गरी घाइते बनाएको इलाका प्रहरी कार्यालय पथरीले जनाएको छ । आक्रमण गर्ने सागर सहितका ६ जनालाई पक्राउ गरी आवश्यक कारवाही प्रक्रिया अगाडि बढाइएको पथरी प्रहरी प्रमुख कमल बजगाईंले बताए । शरीरको विभिन्न भागमा गहिरो चोक लागेका राईको हाल विराटगरको विराट नर्सिङ होममा उपचार भइरहेको छ ।
स्थानीय समीक्षा राईको जन्मोत्सव मनाईरहेका बेला विद्यालयमा भएको फुटवल खेलको विषयमा फेसवुकमा भएको वार्तालाई लिएर घाईते राईका नाति प्रवेश राई र सागर सहितका युवाहरुबीच भएको खटपटले द्वन्दको रुप लिएको प्रहरीको प्रारम्भिक अनुसन्धानबाट खुल्न आएको प्रहरीले बताएको छ ।
