पथरीशनिश्चरे/ मोरङ पथरीशनिश्चरे नगरपालिका ८ का व्यवसायी कैलास शाहको घरमा बुधबार राती भएको आगलागीमा ६० लाख बढीको धनमाल क्षति भएको छ ।
राती २ बजे उठेको आगो विहान ५ बजेमात्र नियन्त्रणमा आएको थियो । आगलागीबाट ५ कोठे पक्की घरका सम्पूर्ण सरसामान लत्ताकपडा, भाडावर्तन, खाध्यान्न जलेर नष्ट भएको स्थानीय युवा नविनजंग कार्कीले जानकारी दिए ।
आगलागीमा परेर २ वटा मोटरसाइकल समेत जलेका छन् । शाहको घरमा ग्यासको डिलर पेट्रोल डिजेल समेतको ब्यापार रहेकाले पनि आगो ग्यास र पेटेलमा सल्किएर निभाउन समस्या भएको इलाका प्रहरी कार्यालय पथरीले जनाएको छ ।
आगलागीबाट करिब ६० लाख बढीको क्षति भएको प्रहरीको प्रारम्भिक अनुमान छ । दमक र सुन्दरहरैचाको दमकल, प्रहरी र स्थानिय बासिन्दाको सहयोगमा आगलागी नियन्त्रणमा लिइएको थियो । विद्युत सर्ट भएको अनुमान गरिएपनि पानी परेर ओसिएको अवस्थामा भएको आगलागीको यकिन कारण भनें खुलिसकेको छैन ।
