धरान । ट्याक्टर चोरी गरेको आरोपमा सङ्खुवासभा खाँदबारी नगरपालिका–८ का २० वर्षीय गजेन्द्र रसाइली पक्राउ परेका छन् ।
जिल्ला प्रहरी कार्यालय सङ्खुवासभाका अनुसार ट्याक्टर चोरी भएको भनी निवेदन परेको आधारमा जाँचपश्चात् रसाइलीलाई बिहीबार लुकिछिपी बसेको अवस्थामा खाँदबारी नगरपालिका–९ बाट पक्राउ गरिएको हो । भोजपुर षडानन्द नगरपालिका –६ कुमालगाउँका ५६ वर्षीय नरबहादुर कुमालको नाममा दर्ता रहेको प्रदेश १–०२–००३ त २७५५ नम्बरको ट्याक्टर सङ्खुवासभाको पाँचखपन नगरपालिका–६ बाट हराएको थियो । ट्याक्टर पुस १६ गते राति चोरी भएको भनी निवेदन परेको थियो ।
खोजी गर्ने क्रममा बेवारिसे अवस्थामा खाँदबारी नगरपालिका–१ आर्मी क्याम्पनजिकै फेला परेको प्रहरीले जनाएको छ । उनलाई जिल्ला अदालत चैनपुरबाट ६ दिनको म्याद थप गरी मुलुकी अपराध संहिता २०७४ अनुसार अनुसन्धान भइरहेको प्रहरीले जनाएको छ ।
