युरोपका फ्रान्स र स्पेनमा फैलिएको भीषण डढेलो नियन्त्रणबाहिर जाँदा दुवै देशमा उच्च सतर्कता अपनाइएको छ। अत्यधिक गर्मी, लामो खडेरी र तीव्र हावाका कारण आगो तीव्र गतिमा फैलिरहेकाले ठूलो संख्यामा सर्वसाधारणलाई सुरक्षित स्थानतर्फ सारिएको छ।
फ्रान्सका राष्ट्रपति इम्यानुएल म्याक्रोंले डढेलोको अवस्थाबारे समीक्षा गर्न आपत्कालीन बैठक बोलाएका छन्। प्रभावित क्षेत्रमा उद्धार, आगो नियन्त्रण र नागरिक सुरक्षाका उपाय प्रभावकारी बनाउन सरकारी निकायबीच समन्वय बढाइएको जनाइएको छ।
फ्रान्सको बोर्डो नजिकको जिरोन्द क्षेत्रमा सबैभन्दा ठूलो डढेलो जारी रहेको छ। त्यहाँ हजारौं हेक्टर वन क्षेत्र जलेर नष्ट भइसकेको छ। प्रतिकूल मौसमका बाबजुद हजारौं अग्निनियन्त्रक, हवाई साधन तथा सैन्य टोली परिचालन गरी आगो नियन्त्रणको प्रयास भइरहेको छ।
स्पेनमा पनि यस वर्षको डढेलो सिजन पछिल्ला वर्षकै गम्भीरमध्ये एक बनेको अधिकारीहरूले बताएका छन्। म्याड्रिड र भ्यालेन्सिया आसपासका क्षेत्रमा फैलिएको आगोका कारण हालसम्म एक लाख ७० हजार हेक्टरभन्दा बढी भूभाग जलेको छ। जोखिम बढेपछि प्रभावित क्षेत्रका बासिन्दालाई स्थानान्तरण गर्न आदेश दिइएको छ।
स्पेनका प्रधानमन्त्री पेद्रो साञ्चेजले डढेलोलाई जलवायु संकटको परिणामका रूपमा व्याख्या गर्दै प्रभावित नागरिकलाई आवश्यक सबै सरकारी सहयोग उपलब्ध गराइने बताएका छन्। उनले उद्धार तथा राहत कार्यलाई प्राथमिकतामा राखिएको स्पष्ट पारे।
अधिकारीहरूका अनुसार जलवायु परिवर्तन, लामो समयदेखिको खडेरी र बारम्बारको गर्मीको लहरले डढेलो फैलिन अनुकूल अवस्था सिर्जना गरेको छ। विज्ञहरूले ‘फायर क्लाउड’ ९पाइरोक्युमुलोनिम्बस० बन्न थालेको चेतावनी पनि दिएका छन्, जसले शक्तिशाली हावा र चट्याङ उत्पन्न गरी आगोलाई अझ खतरनाक र नियन्त्रण गर्न कठिन बनाउन सक्छ।
मौसम पूर्वानुमानमा आगामी दिनहरूमा पनि तातो र सुख्खा अवस्था कायम रहने संकेत गरिएकाले आपत्कालीन सेवाहरू उच्च तयारीमा राखिएका छन्। यसले डढेलोको संकट अझ गम्भीर बन्न सक्ने चिन्ता बढाएको छ।
