धनुकटा(ब्लाष्ट) जिल्लाको डाँडाबजारमा मादक पदार्थ सेवन गरी शनिबार साँझ एक युवकले बजारमा घुमिरहेका बेला खुकुरी प्रहार गरी सातजनालाई गम्भीर घाइते बनाएका छन् । ती युवक पनि स्थानीयको कुटाइबाट गम्भीर घाइते भएको प्रहरीले जनाएको छ ।
डाँडाबजार–६ का ३२ वर्षीय श्याम लिम्बूले ९ वर्षीय बालकदेखि ७० वर्षीय वृद्धासम्मलाई निर्ममतापूर्वक खुकुरी प्रहार गरी घाइते बनाएको डाँडाबजार प्रहरी चौकीका असई मोहितकुमार यादवले बताए । लिम्बूको खुकुरी प्रहारबाट घाइते हुनेहरुमा खुवाफोक–८ की ४० वर्षीया सुमित्रा तामाङ, ३३ वर्षीया दिलुकुमारी तामाङ, ९ वर्षे सुजन तामाङ, ५८ वर्षीय गंगा देवान, खुवाफोक–६ का ७० वर्षीया पूर्णिमा लिम्बू, डाँडाबजार–४ की २८ वर्षीय सुरेश लिम्बू र सोही वडाका दिलबहादुर लिम्बू छन् ।
घाइते सबैको उपचार धरानको वीपी कोइराला स्वास्थ्य विज्ञान प्रतिष्ठानमा भइरहेको प्रहरीले जनाएको छ । घटनापछि स्थानीयको कुटपिटबाट गम्भीर घाइते आक्रमणकारी लिम्बूको उपचार पनि प्रतिष्ठानमै भइरहेको छ ।
