नेपाली चलचित्रको इतिहासमै सबैभन्दा धेरै कमाई गर्न सफल ब्लकबस्टर चलचित्र ‘छक्का पन्जा’को पछाडि २ राखेर नयाँ चलचित्रको घोषणा गरिएको छ । फागू पूणिर्माको अवसर पारेर आमा सरस्वती मुभिजको ब्यानरमा बन्ने चलचित्रको घोषणा भएको हो । चलचित्रको नाम, ‘छक्का पन्जा २’ राखिएको छ ।
यो चलचित्रलाई ‘छक्का पन्जा’की निर्देशक दीपाश्री निरौलाले नै निर्देशन गर्नेछिन् । अहिले कथावस्तुमा काम भैरहेको छ । चलचित्रमा ‘छक्का पन्जा’का मुख्य कलाकार दीपकराज गिरी, जितु नेपाल, शिवहरि पौडेल, केदार घिमिरे, वुद्धि तामाङ, प्रियंका कार्की, बर्षा राउत ‘छक्का पन्जा २’का लागि फाइनल भैसकेका छन् । चलचित्रका लागि एक नायक र एक नायिका फाइनल गर्न बाँकी छ । चलचित्रका निर्माता तथा कलाकार दीपकराज गिरीले नायक र नायिका चलेकै हुने बताए । चलचित्रको बारेमा उनले भने-‘छक्का पन्जा जहाँबाट सकियो, त्यहीबाट ‘छक्का पन्जा २’ सुरु हुन्छ भन्ने होइन । तर, दर्शकले चलचित्र हेर्दै जाँदा ‘छक्का पन्जा’को पनि याद गर्नुहुनेछ । साथै, ताजा कथामा चलचित्र हेर्न पाउनुहुनेछ ।’ दीपकका अनुसार, चलचित्रले नयाँ र पुराना जेनेरेशनको प्रतिनिधित्व गर्नेछ । साथै, ‘तितो सत्य र ‘छक्का पन्जा’ चलचित्रका फ्यानले ‘छक्का पन्जा २’लाई अझ मन पराउने उनको विश्वास छ ।
उनका अनुसार चलचित्रको छायांकन जेठ १० गतेबाट सुरु गरिनेछ । किरण कँडेलले एउटा गीतमा अहिले संगीत भरिरहेको दीपकले बताए ।
