दिपायल/ दिपायलको पिपल्ला बजारमा लागेको आगो नियन्त्रणमा आएको छ । पिपल्ला बजारको मुख्य भागमा रहेको जेवी पेट्रोल पम्पबाट शुरु भएको आगलागी करिब २ घण्टापछि नियन्त्रणमा आएको हो । आगो नियन्त्रणका लागि पानी बोक्ने ट्यांकर, प्रहरी र स्थानीयवासी खटेका थिए ।
जिल्लामा रहेको दमकल विग्रिएका कारण आगो नियन्त्रणमा समस्या आएको थियो । दिपायमा दमकल नभएपछि स्थानीय प्रशासनले डडेल्धुराबाट दमकल मगाएको थियो । तर दमकल आइपुग्नु पहिले नै आगो नियन्नत्रणमा आएको प्रहरी निरीक्षक बल्लबबहादुर सिंहले बताए ।
जेवी पेट्रोल पम्पमा पेट्रोल अनलोड गर्न क्रममा ना २ ख ४५७९ नम्बरको ट्यांकरबाट आगलागी शुरु भएको थियो । ट्यांकरमा आगलागी शुरु भएसँगै पेट्रोल पम्प, कांग्रेस सांसद कल्पना शोभाको सुनचाँदी पसल, मोहित होटल पनि पूर्ण रुपमा नष्ट भएको छ ।
