धरान/आमिर खानले सधैँ दर्शकलाई अचम्मित बनाउने काम गरिरहेका हुन्छन् । अब उनी भारतीय सिनेमाका लागि अनौठो काम गर्नेवाला छन् । उनी चलचित्रमा समुद्री लडाइँ लड्दैछन् । उनी बाहुबली जस्तै ठूलो योद्धा बन्ने छन् ।
भारतीय समाचार पोर्टल जागरणका अनुसार यशराज ब्यानरको चलचित्र ‘ठग्स अफ हिन्दोस्तान’ लाई ठूलो परिमाणमा निर्माण गरिँदैछ । यो चलचित्रका केही सिनलाई बाहुबली भन्दा ठूलो र भव्य तरिकाले सुट गरिने दाबी गरिएको छ । चलचित्रमा समुद्रभित्रको लडाइँलाई भव्य रूपमा देखाइने छ ।
हलिउडको चलचित्र ‘पाइरेट्स अफ क्यारेबियन’ को झल्को यो चलचित्रमा आउने बताइएको छ । आमिर खान, अमिताभ बच्चन र फातिमा सना शेख अभिनित ‘ठग्स अफ हिन्दोस्तान’ भारत स्वतन्त्र हुनुभन्दा अघिको कथामा आधारित छ । चलचित्रमा भयंकर तरबार युद्धको सिन समेत भएको बताइएको छ । चलचित्रमा यी भव्य सिनका लागि अन्तर्राष्ट्रिय टीमलाई छनोट गरिएको छ । चाँडै नै चलचित्रले कलाकारलाई यस बारे प्रशिक्षण दिनेछ ।
आमिर खान यो चलचित्रलाई लिएर निकै उत्साहित र गम्भीर पनि छन् । तसर्थ चलचित्रको सुटिङ शेड्युललाई पर सारिएको छ । स्क्रिप्टलाई अझ कसिलो बनाइने निर्माण पक्षको भनाइ छ ।बाह्खरीबाट
