भद्रपुर । झापाको भद्रपुरमा जिल्लास्तरीय प्रथम नकआउट फुटबल प्रतियोगिता हुने भएको छ ।
सिरीजङ्गा स्पोटिङ्ग क्लव पृथ्वीनगरको आयोजनामा यही बैशाख १६ गतेदेखि २३ गते सम्म प्रतियोगिता हुने क्लवका अध्यक्ष पूर्णमाया लिम्बुले बताइन् ।
साविक पृथ्वीनगर ४ हाल भद्रपुर ३ स्थित ज्ञानेचोकमा हुने प्रतियोगितामा जिल्लाका ८ वटा टिमले सहभागिता जनाउने छन् ।
सैनिक युथ क्लव, मुनाल क्लव चन्द्रगढी, झापा एफसी राजगढ, एलेभेन साइनिङ्ग स्टार भद्रपुर, बाहुणडाँगी क्लव मेचीनगर, न्यु स्टार खोपवारी, काकँडभिट्टा फूटबल एकाडेमी र आयोजक सिरीजङ्गा स्पोटिङ्ग क्लवले भाग लिने क्लवका खेल संयोजक भीम लिम्बुले बताए ।
क्लवको स्तरउन्नती र स्थानीयस्तरका खेलाडीको क्षमता अभिवृद्धि गराउने उदेश्यले पहिलो पटक प्रतियोगिताको आयोजना गर्न लागेको उनले बताए । करिब ६ लाख खर्च हुने यस प्रतियोगितामा विजेता टिमलाई नगद ५१ हजार १११ र उपविजेता टिमलाई नगद ३१ हजार १११ सहित शिल्ड, मेडल तथा प्रमाणपत्र वितरण गरिने क्लवका सचिव हेमबहादुर राईले जानकारी दिए ।
