मोरङ । विराटनगर महानगरपालिका–४ कोशी राजमार्गमा माइक्रो दुर्घटना हुँदा १० जना घाइते भएका छन् ।
इटहरीबाट विराटनगरतर्फ आउदै गरेको को १ ज २८७४ नम्बरको माइक्रो शनिबार राती दुर्घटना भएको हो । सडकमा राखिएको डिभाइडरमा ठोक्किँदा दुर्घटना भएको प्रहरीले जनाएको छ । घाइते मध्ये ६ जनाको अवस्था गम्भीर रहेको छ ।
घाइते हुनेमा विराटनगर १३ का सरोजा थापा, तुलसा खडका, निर्मला खडका, भावना श्रेष्ठ, चन्द्रकला पोखरेल, दुर्गा पोखरेल गम्भीर रहेको प्रहरीले जनाएको छ । त्यस्तै, अम्बिका खडका, निर्मला थापा, धन माया घिमिरे तथा माइक्रो चालक बुढीगंगा गाउँपालिका–३ का चन्द्रप्रसाद अधिकारी सामान्य घाइते भएका छन् । घाइतेहरुको विराटनगर नर्सिङ होममा उपचार भइरहेको छ ।
