पथरीशनिश्चरे /मोरङको पथरीशनिश्चरे नगरपालिकाको ‘ज्येष्ठ नागरिकसंग नगरपालिका’ कार्यक्रम अन्तर्गत ८० वर्षमाथिका ज्येष्ठहरुको घर घरमा गएर चेकजाँच गर्ने दोस्रो चरण सुरु भएको छ ।
गत वैशाखबाट थालिएको यो कार्यक्रमको दोस्रो चरणमा २ नम्बर वडामा ज्येष्ठको चेकजाँच सुरु भएको स्वास्थ्य संयोजक मुरारी आचार्यले जनाए । यस क्रममा नगर प्रमुख दिलीपकुमार राई समेत सहभागि भई ज्येष्ठहरुको सन्च-विसन्चका बारेमा सोधपुछ गरिएको छ । नगर प्रमुखसँगको भेटमा ज्येष्ठहरुले घर-घरमै आएर निशुल्क चेक जाँच गर्दै स्वास्थ्य सल्लाह दिने नगरपालिकाको कार्यक्रम प्रति खुसी व्यक्त गरेको स्वास्थ्य संयोजक आचार्यले बताए । ७० वर्ष माथिकाको उपचारमा १ नम्बर प्रदेशका अस्पतालमा जाँदा एक तर्फी एम्बुलेन्स भाडा नगरपालिकाले व्यहोरिदिने कार्यक्रमले पनि ज्येष्ठहरुमा खुसी भएको ज्येष्ठ नागरिक अगुवा ज्ञानेन्द्र भट्टराईले जनाए ।
गत वैशाखसम्मको तथ्यांक अनुसार नगरमा ८० वर्षमाथिका ज्येष्ठको संख्या ९ सय २७ रहेको छ । त्यसमध्ये पहिलो चरणमा ६ सय २२ जनाको चेकजाँच भएको छ । प्रत्येक महिना घर-घरमा चेकजाँच र स्वास्थ्य परापर्शका लागि सरिता कटुवाल, ममता माझी, एल्डिना गुरुङ र रविना तामाङ खटिएका छन् । तात्कालिन अवस्था हेरेर विरामीका लागि स्वास्थ्य चौकीमा पाइने औषधि पनि प्रदान गरिने गरेको छ ।
