पाँचथर/ फाल्गुनन्द गाउँपालिकालाई १–० को झिनो गोलअन्तरले हराउदै तुम्बेवा गाउँपालिका फिदिममा जारी दोस्रो तरुण नकआउट गोल्डकप फुटवल प्रतियोगिताको फाइनलमा प्रवेश गरेको छ । फिदिम माविको खेलमैदानमा बुधबार भएको पहिलो सेमीफाइनल खेलमा २४ मिनेटमा पुरण कुरुम्बाङले गरेको गोलको मद्धतले तुम्बेवा उपाधि नजिक पुगेको हो । खेलको म्यान अफ् दि म्याच तुम्बेवाका पुरण कुरुम्बाङ बने । उनले नगद एक हजार रुपैंयाँ प्राप्त गरे । कमजोर प्रतिस्पर्धी मानिएको तुम्बेवाले क्वाटरफाइनलमा प्रतियोगिताकै बलियो प्रतिद्वन्द्वी मानिएको फिदिम नगरपालिकाको टिम बिरुद्ध पनि १–० को अप्रत्यासित नतिजा निकाल्दै सेमीफाइनल यात्रा तय गरेको थियो । प्रतियोगिता अन्तर्गत बिहीबार कुम्मायक गाउँपालिका र मिक्लाजुङ गाउँपालिकाबीच अन्तिम सेमीफाइनलको खेल हुने छ ।
