पाँचथर । पाँचथरको सुख्खाक्षेत्र कुम्मायक गाउँपालिकामा खानेपानी समस्या देखा पर्न थालेको छ । देश लामो समयदेखि लक डाउनको अवस्थमा भएको बेला गाउँपालिकामा खानेपानी समस्या देखा परेको हो । गाउँपालिकामा संचालित तमोर लिफ्ट खानेपानी योजनामा विद्युतिय समस्या देखा पर्दा खानेपानीको अभाव देखा परेकोे छ ।
खानेपानीको समस्याका कारण घण्टौं लगाएर पानी बोक्नु परेको स्थानीय गंगा चेम्जोङ बताउछन् । कुम्मायक ५ को बिजुवापानी डिपबोरिङमा समस्या देखा परेपछि खानेपानी समस्या देखा परेको छ । त्यस्तै तमोर खानेपानी योजना पनि अनियमित हुदा ३ घण्टाको बाटो हिडेर पानी बोक्नु परेको चेम्जोङको भनाइ छ ।
तमोर खानेपानी योजनाबाट सुख्खाक्षेत्रका ७० प्रतिशत नागरिकले तमोर लिफ्ट खानेपानीको उपभोग गर्दै आएका छन । केही दिन अघि योजनाको ५ औ खानेपानी ट्याङकीको ट्रान्सफर्मरमा समस्या देखा परेको थियो । तर नयाँ ट्रान्सफर्मर जडान गरेपछि विद्युतीय समस्या देखा पर्दा नियमित खानेपानी संचालन नहुदा बजार क्षेत्रमा समस्या झन जटिल बनेको छ ।
बजार आसपासमा खानेपानीका श्रोत नहुदा समस्या देखा परेको बजारवासीको गुनासो छ । बजारमा देउराली खानेपानी, डिपबोरिङ खानेपानी योजना र तमोर लिफ्ट खानेपानी योजना नियमित संचालन नहुदा लकडाउनको अवस्थमा समस्या भएको यासोक बजारका व्यवसायी अविशेक श्रेष्ठले बताए ।
