विजयपुर । कोशी प्रदेशका मुख्यमन्त्री हिक्मतकुमार कार्कीले प्रदेशसभाबाट विश्वासको मत प्राप्त गरेका छन् ।
सोमबार बसेको प्रदेशसभा बैठकमा भएको मतदानमा उनको पक्षमा ५७ मत र विपक्षमा २२ मत परेको हो। मुख्यमन्त्री कार्कीको पक्षमा नेकपा एमाले र नेपाली कम्युनिस्ट पार्टीका सांसदहरूले मतदान गरेका थिए भने नेपाली कांग्रेसका सांसदहरूले विपक्षमा मतदान गरे। कोशी प्रदेशसभामा एमालेका ४० र नेपाली कम्युनिस्ट पार्टीका १७ सांसद छन्। राप्रपाका सांसदहरू भने मतदानमा तटस्थ बसे। राप्रपाका सभामुखसहित पाँच सदस्य छन्। जनता समाजवादी पार्टीकी एक्ली सांसद निर्मला लिम्बु बैठकमा अनुपस्थित रहिन्।
९३ सदस्यीय कोशी प्रदेशसभामा एक जनाले राजीनामा दिएपछि हाल ९२ सदस्य छन्। सोमबारको बैठकमा भने ८३ जना सांसद उपस्थित थिए। यससँगै मुख्यमन्त्री कार्कीले प्रदेशसभाबाट सरकार सञ्चालनका लागि आवश्यक विश्वासको मत प्राप्त गरेका छन्।
