पशुमा खोेरेत रोगको प्रकोप

बैतडी/महाकाली गाविसमा पशुमा खोेरेत रोग देखा परेको छ । खोेरेत रोग फैलिएपछि जिल्ला पशुसेवा कार्यालयले खोरेतविरुद्धको खोपसहित पशु प्राविधिक टोली प्रभावित क्षेत्रमा खटाएको छ । जिल्ला पशुसेवा कार्यालयका प्रमुख वरिष्ठ पशु विकास अधिकृत डा नवीन घिमिरेका अनुसार ७५० सुईसहित पशु प्राविधिक टोली पठाएको र खोप लगाउने कार्य सुरु भएको बताए । महाकाली गाविसका तीन वटा वडामा खोरेत रोगबाट गाई, भैँसी तथा गोरु प्रभावित भएका छन् । “खोप समान्य अवस्थाका पशु र अन्य निरोगी पशुलाई समेत दिइने छ,” उनले भने । रोगबाट सिकिस्त पशुलाई खोप नदिइने डा घिमिरेले बताए । एक महिना अघि पनि सो क्षेत्रमा खोरेत रोग देखा परेको थियो । उतिबेला नियन्त्रणमा आइसकेको रोग फेरि फैलिएपछि किसान चिन्तित बनेका छन् । रोगबाट एक गोरु मरेको छ भने १०० भन्दा बढी पशु बिरामी परेका बताइएको छ । -रासस