काठमाडौँ/ ‘शिक्षकलाई महत्व दिऔँ, उनीहरुको अवस्थामा सुधार ल्याऔँ’ भन्ने नाराका साथ आज विश्व शिक्षक दिवस मनाइयो । नेपाल शिक्षक महासङ्घको आयोजनामा आज यहाँ आयोजित एक कार्यक्रममा शिक्षामन्त्री धनीराम पौडेलले विद्यालय कर्मचारी र शिक्षकको समस्या समाधान गर्न ‘रोडम्याप’ बनाएर अगाडि बढ्नुपर्ने बताए ।
मन्त्री पौडेलले भने जिल्लामा राहत तथा अस्थायी शिक्षकले तलब नपाएको भन्ने गुनासो आइरहेको छ ,उहाँहरुले चिन्ता गर्नु पर्दैन । कसैलाई पनि सरकारले मर्कामा पार्ने काम गर्दैन ।” नेपाल शिक्षक सङ्गठनका अध्यक्ष बाबुराम थापाले नेपालले ५० वर्षअघि शिक्षकका बारेमा जनाएको अन्तर्राष्ट्रिय प्रतिबद्धतालाई कार्यान्वयन गराउन अहिलेसम्म पनि दबाब र आन्दोलन गर्नुपर्ने बाध्यता रहेको गुनासो गरे। अखिल नेपाल शिक्षक सङ्गठनका महासचिव शङ्कर अधिकारीले शिक्षा क्षेत्रलाई प्रभावकारी बनाउन अस्थायी र राहत शिक्षकका समस्या समाधान गर्नुपर्ने सुझाव दिए ।
महासङ्घका अध्यक्ष केशव निरौलाले शिक्षकसम्बन्धी कानुन कार्यान्वयनका लागि शिक्षक महासङ्घका सहभागिता हुनैपर्नेमा जोड दिए । नेपाल शिक्षक सङ्घका उपाध्यक्ष विष्णुदेवी पाण्डेले शिक्षामा जति लगानी गरे पनि शिक्षकलाई हेर्ने दृष्टिकोणमा फरक नआएसम्म लगानीको प्रतिफल नआउने बताए ।नेपाल राष्ट्रिय शिक्षा सङ्गठनका पूर्वअध्यक्ष बाबुराम अधिकारीले सरकारले विगतमा शिक्षकसँग गरेको सहमतिलाई कार्यान्वयन गर्नुपर्नेमा जोड दिए ।
