नेपाली सेनामा कार्यरत जवानहरूको माया, प्रेम, व्यथा र विछोडलाई आधार बनाएर गायक प्रमोद खरेलको स्वरमा ‘रोयो फौजीको मन’ बोलको म्युजिक भिडियो रिलिज भएको छ ।
काठमाडौंको अनामनगरमा शनिबार आयोजित विशेष कार्यक्रममा म्युजिक भिडियोको पूर्वमन्त्री एवम् चुरेभावर राष्ट्रिय एकता पार्टीका अध्यक्ष बद्रीप्रसाद न्यौपानेसहितका कलाकारहरूले विमोचन गरेका हुन् । गीतका शब्द भक्ति रिजालले लेखेका हुन् । गीतमा संगीत सुशील विश्वकर्माले दिएका छन् ।
राष्ट्र सेवामा अहोरात्र खटिनुपर्ने तथा आफ्नो मायाप्रेमलाई पनि जोगाइ राखनुपर्ने बाध्यता फौजी पेशा अपनाउनेहरूका लागि सामान्य हो भन्ने कुरा म्युजिक भिडियोमा देखाउन खोजिएको छ ।
ड्युटीमा अहोरात्र खटिनुपर्दा आफ्ना प्रेयसीसँग भेटघाट गर्न पनि समस्या हुने बाध्यता पनि गीतका शब्दमा छन् ।
म्युजिक भिडियोलाई नवीन पन्तले निर्देशन गरेका हुन् । पी.एन. इन्टरटेन्मेन्ट प्रालिका लािग अनु पोखरेल र निर्मला न्यौपानेले निर्माण गरेको म्युजिक भिडियोमा नायिका मञ्जिता केसी, नवीन न्यौपाने र कुमार थापाले अभिनय गरेका छन् । म्युजिक भिडियोको छायाँकन बिक्रम कार्की र सम्पादन मनीष कार्कीले गरेका हुन् ।
