भद्रपुर । जंगली हात्तीको आक्रमणबाट झापामा एक महिला घाइते भएकी छन् । झापाको कचनकवल गाउँपालिका ६ डम्बरगाँछीकी ४७ बर्षीय फूलकुमारी राई घाइते भएको जिल्ला प्रहरी कार्यालय झापाले जनाएको छ । हात्तीको आक्रमणबाट सामन्य घाइते भएकी उनको स्थानीय अस्पतालमा उपचार भइरहेको डिएसपी जितेन्द्रकुमार बस्नेतले जानकारी दिए । शुक्रवार विहान ५ बजे गाँउमा आएका दुई जंगली हात्तीले स्थानीय तेजमान राईको घर भत्काएको छ । राईको एक तले घरको पर्खाल भत्काएर उनकै श्रीमतीलाई घाइते बनाएको डिएसपी बस्नेतले बताए । केही दिनयता भद्रपुर नगरपालिका र कचनकवल गाँउपालिका आसपासका क्षेत्रमा जंगली हात्तीको उपद्रोले स्थानीय त्रासिद बनेका छन् । जंगली हात्तीको समूहले दुई दिनअघि मात्र भद्रपुर ३ र ४ मा चार वटा घर भत्काउनुका साथै अन्नवाली समेत नष्ट गरिदिएको थियो ।