काडमाण्डौ/ कक्षा १२ को वार्षिक परीक्षा आजदेखि शुरु भएको छ । पहिलो दिन आइतबार अंग्रेजी विषयको परीक्षा बिहान ७ बजेबाट देशभर सुरु भएको हो ।
राष्ट्रिय परीक्षा बोर्डका अनुसार परीक्षामा ४ लाख २८ हजार ५२ विद्यार्थी सहभागी रहेका छन् । यो साधारण तथा प्राविधिक विषय समूहतर्फका नियमित, ग्रेडवृद्धि एवं आंशिक परीक्षार्थीको कूल संख्या हो ।
देशभर १ सय ७ परीक्षा केन्द्र कायम गरिएको बोर्डले जनाएको छ । परीक्षालाई मर्यादित बनाउन १३ हजार २ सय ८४ जना सुरक्षाकर्मी परिचालन गरिएको छ ।
परीक्षाको नियम उल्लंघन गर्नेलाई ६ महिना कैद र १ लाख रुपियाँसम्म जरिवाना गरिने बोर्डले जनाएको छ ।परीक्षामा अनियमितता हुन नदिन यसपटकबाट थप कडाइ गर्ने गरिएको हो ।
