भद्रपुर । प्रेमीको छुरा प्रहारबाट सख्त घाइते भएकी प्रेमिका उपचार अभावमा मृत्युसँग लडिरहेकी छन् । जीन्दगीभरी कहिल्यै नछुटिने गरी झापा कनकाई ३ कालिस्थानकी ३८ बर्षिया विना लिम्बू र सोही नगरपालिका ३ भीमसेनस्थानमा डेरा गरी बस्ने पदमबहादुर कुमालबिच प्रेम विवाह भएको थियो । सात महिना अघि प्रेम विवाह गरेका ती जोडीमाथि श्रीमानले दिनहुँ गरेको मादक पदार्थ सेवन नै कारक बन्न पुग्यो ।
श्रीमानले मादक पदार्थ खाएर विनासँग दिनहुँ झैझगडा गर्ने र कुटपिट गर्ने क्रममा पछिल्लो पटक गत फागुन २४ गते बुधबारका दिन पदमबहादुरले श्रीमती विनाको पेटमा छुरा र टाउकोमा फलामको घनले हानेर सख्त घाईते बनाए । विनाले विवाह गर्दा श्रीमानसँगै जिउने कल्पना गरेकी थिइन् । तर,विवाहको खुशी भने लामो समय टिकेन । बेलाखखतमा झगडा हुँदा गाउँले र विनाका दाजु सोमबहादुर लिम्बूले आएर सम्झाई बुझाई मिलाएर राख्ने गरेको स्थानीय मेघराज पाठकले बताए ।
घट्नापछि श्रीमतीलाई घाइते बनाउने पदमबहादुर प्रहरीले आवश्यक कारबाहीका लागि इलाका प्रहरी कार्यालय बिर्तामोडमा राखेको छ भने उपचार अभावमा विना मृत्युसँग पैठेजोरी खेल्दै आएकी छन् । कनकाई नगरपालिका २ सुकेडाँगीमा डेरा गरि बसेको कुमाल परिवारले जनमन गर्दै आएको थियो । हतियार प्रहार गर्ने पदमबहादुरलाई प्रहरीले पक्राउ गरि ज्यान मार्ने उद्योगमा मुद्दा दर्ता गरेको छ ।
घाईते विनालाई स्थानीय गाउँले र घाईतेका दाजु भाउजुले चन्दा सङ्कलन गरेर केहि दिन झापा र धरानको घोपामा लगेर उपचार गराएका थिए । थप उपचार गर्नका लागि आर्थिक अभावका कारण हाल घरमै ल्याएर राख्नुपरिरहेको घाईतेकी भाउजु निर्मला लिम्बूले बताइन् । सोमबहादुर पनि जनमन गरेर परिवार पाल्दै आएको र गाउँघरमा उठाएको रकम सकिएपछि हाल घरमै ल्याएर राख्नुपरेको घाइतेका दाजु लिम्बुले बताए ।
उपचार अभावमा घाईतेको अवस्था दिनानुदिन नाजुक बनिरहेको निर्मलाको भनाइ छ । टाउकोको घाउ कान तिर सर्दै कालो रगत आइरहेको उनले सुनाइन् । इलाका प्रहरी विर्तामोडले घाउँजाँच फारम भर्नु भनेपछि विरामीलाइ समेत लिएर बुधबार इलाका गएर फारम भरेपनि रकम अभाव भएको उनले जानकारी दिइन् ।
पीडित परिवारले उपचारका लागि आर्थिक सहयोग गरिदिनका लागि सबै सहयोगी मनहरुमा अनुरोध गरेका छन् । यसवारेमा केहि बुझ्न परेमा विनाका दाजु सोमबहादुर लिम्बूको फोन नम्बर ९८१५०५२०४५ मा फोन गर्न वा यस विना बचाऊ अभियानको नेतृत्व गरिरहेका स्थानीय युवा मेघराज पाठकको नाममा रहेको सनराईज बैँक लिमिटेड सुरुङगा झापाको खाता नम्बर ०३८१०१०६१७२०१६ मा रकम जम्मा गरिदिन सबैसंग अनुरोध गरेका छन् ।
