भद्रपुर । पूर्वराजा ज्ञानेन्द्र शाहसँग राप्रपा अध्यक्ष राजेन्द्र लिङ्देनबीच सम्बन्ध चिसिएको चर्चा लामो समयदेखि भइरहेको बेला पुर्व राजा शाहसँग भेटवार्ता भएको छ । राप्रपा अध्यक्ष लिङ्देनसहित पार्टीका उच्च नेताहरुले बुधबार शाहसँग भेटवार्ता गरेका हुन् ।
झापा दमकको चियाबारीस्थित मिनी दरबारमा बस्दै आएका शाहसँग पार्टीका वरिष्ठ उपाध्यक्ष रविन्द्र मिश्र, महामन्त्री धवलशमशेर राणा र वरिष्ठ नेता डा. प्रकाशचन्द्र लोहनी सहभागी थिए । वरिष्ठ उपाध्यक्ष मिश्रले आफ्नो फेसबुक वालमा भेटवार्ता पछि उभिएर खिचिएको एउटा तस्वीर पोस्ट गर्दै – ‘बीचमा देशको मियो, छेउछेउमा हामी ।’लेखेका थिए ।
मिश्रको पोस्टमा नकारात्मक कमेन्टको बाढी आएको छ । अधिकांश कमेन्टमा राजतन्त्रको विषय बेकार रहेको टिप्पणी आएका छन् । त्यसैगरी राप्रपा अन्र्तगतको मिडिया नेपालका झापा अध्यक्ष रञ्जीत प्रसाईले पनि उनको फेसबुक वाल( सामाजिक सञ्जालमा )विषेश भेटघाट एवम् महत्वपूर्ण छलफल भनेर लेखेका छन् ।
मेडिकल व्यवसायी दुर्गा प्रसाईले झापाबाट सुरु गरेको मेची महाकाली अभियानको उद्घाटन समारोहमा पूर्वराजा शाह परिवारका सदस्यहरुसहित सहभागी बनेपछि राप्रपासँग पूर्वराजा असन्तुष्ट भएर प्रसाईका कार्यक्रमतिर लागेको चर्चा हुन थालेको थियो ।
प्रसाईले पनि आफ्ना भाषणहरुमा राप्रपाले राजतन्त्रको मुद्दा त्यागेको आरोप लगाउँदै राप्रपा अध्यक्ष लिङ्देनको मजाक उडाउने गरेका थिए । राप्रपा अध्यक्ष लिङ्देन र प्रसाईबीच व्यक्तिगत आरोप प्रत्यारोपका उत्तेजक भाषणबाजी समेत हुने गरेको थियो ।
नेकपा माओबादीका अध्यक्ष पुष्पकमल दाहाल प्रचण्डको नेतृत्वमा रहेको सरकारमा लिङ्देन मन्त्री बनेपछि पूर्वराजा शाह राप्रपासँग झनै चिढिएको चर्चा हुने गरेको थियो । लिङ्देनले शाहसँग सल्लाह लिन छाडेको समेत चर्चा हुने गरेको थियो ।
तर, सरकारबाट बाहिरिएको राप्रपाले राष्ट्रपति र उपराष्ट्रपतिको चुनावमा मत नहाल्ने निर्णय गरेपछि पूर्वराजा शाह राप्रपासँग खुशी रहेको राप्रपा निकट नेताहरु बताउँछन् । यहीकारण पूर्वराजा शाह र राप्रपा अध्यक्ष लिङ्देनबीच दमकका भेटवार्ता भएको बताइएको छ ।
