धरान । मिराकल बास्केटबल क्लबको आयोजनामा सम्पन्न दोस्रो मिराकल थ्री बाइ थ्री बास्केटबल च्याम्पियनसिपको उपाधि ब्रदर्स क्लब ए टिमले चुुमेको छ ।
शनिबार सम्पन्न च्याम्पियनसिपको पहिलो र दोस्रो दुवै उपाधि ब्रदर्स ए र ब्रदर्स बी टिमले जितेको छ । दुवै टिम फाइनल पुगेका ब्रदर्स एले ब्रदर्स बी टिमलाई फाइनलमा १५–११ अङ्कले हराएको हो । ब्रदर्स ए टिमले उपाधिसँगै नगद १० हजार रुपैयाँ, ट्रफी, मेडल र प्रमाण–पत्र प्राप्त गरेको छ ।
यसैगरी उपविजेता ब्रदर्स बी टिमले नगद पाँच हजार, ट्रफी, मेडल र प्रमाण–पत्र प्राप्त गर्यो । प्रतियोगिताका उत्कृष्ट खेलाडी एमभिपीको उपाधि ब्रदर्स ए टिमका सर्वोधन राई घोषित भए । उनले एक थान बास्केटबल, ट्रफी र प्रमाण–पत्र प्राप्त गरे । धरान बास्केटबल सङ्घ र सुनसरी बास्केटबल सङ्घको सहयोगमा सम्पन्न प्रतियोगितामा धरान, बिर्तामोड र तरहरा गरी २२ टिम सहभागी थिए ।
