पानवारी । तत्कालिन नेकपा एमालेका पाँचकन्या गाउँ कमिटि अध्यक्ष रहेका शुभचन्द्र राईको निधन भएको छ ।
लामो समयदेखि क्यान्सर रोगबाट पीडित राईको आइतबार विहान निधन भएको हो । क्यान्सर रोगबाट पीडित राईको ४८ वर्षको उमेरमा निज निवास धरान–५ देउरालीमा निधन भएको हो । राई विद्यार्थी कालदेखि राजनीतिमा संलग्न भई अहिले नेकपा एमाले धरान नगर कमिटिका सचिवालय सदस्य हुन् । क्यान्सरको उपचार सम्भव नहुने भएपछि उनलाई भरतपुर क्यान्सर अस्पतालबाट करिब २ महिना अगाडी घर ल्याइएको थियो । उनको परिवारमा श्रीमती र तीन छोराहरु रहेका छन् ।
भोली (सोमबार) उनको घरैमा पुगेर पार्टीको झण्डा ओढाएर श्रद्धाञ्जली अर्पण गर्ने कार्यक्रम रहेको नेकपा एमाले धरान सचिव राजमणी निरौलाले जानकारी दिएका छन् । नेकपाका केन्द्रीय नेता तथा प्रदेशका मन्त्रीको समेत उपस्थितिमा श्रद्धाञ्जली अर्पण गरिने कार्यक्रम रहेको समेत निरौलाले जानकारी दिएका छन् ।
