विराटनगर । इन्डो–नेपाल टी–२० ‘मिल्स कप क्रिकेट’ प्रतियोगिताको उपाधि पूर्वाञ्चल क्रिकेट क्लब विराटनगरले जितेको छ ।
मिल्स क्रिकेट क्लब एण्ड एकेडेमीको आयोजनामा विराटनगरस्थित जुटमिलको खेलमैदानमा मङ्गलबार सम्पन्न फाइनल खेलमा भारतको समशेर क्रिकेट क्लब कानपुरलाई ६ रनले हराउँदै पूर्वाञ्चलले उपाधि जितेको हो ।
जितसँगै पूर्वाञ्चलले नगद १ लाख ११ हजार रुपैयाँको साथै ट्रफी हात पार्यो । उपविजेता भएको कानपुरले नगद ५१ हजार रूपैयाँमा चित्त बुझायो । टस जितेर ब्याटिङ गरेको पूर्वाञ्चलले निर्धारित २० ओभरमा २ सय ४ रनको योगफल खडा गर्दै अलआउट भएको थियो ।
अलराउण्ड प्रदर्शन गरेका पूर्वाञ्चलका मन्जित श्रेष्ठले २६ बलमा ४६ रन बनाए । उनको ब्याटबाट ३ छक्का र ६ चौका निस्कियो ।पूर्वाञ्चलका रसित खानले २१ बलमा ४६ रन जोडे । श्रवण यादवले १६ बलमा ४० र मुकुन्द यादवले २२ बलमा २९ रन ल्याए ।कानपुरका दिमाङ्सु र किसन लालले समान ३–३ विकेट लिए । श्रेष्ठा मिश्राले २ विकेट लिए ।
जवाफमा २ सय ५ रनको विजय लक्ष्य पछ्याएको कानपुरले २० ओभरमा ९ विकेटको गुमाउँदै १ सय ९८ रनमा सीमित भयो । कानपुरका राहुल सिंहले २२ बलमा ३९ रन बनाए । रवि रोयले २२, हर्षिद सिंहले २७ र श्रेष्ठा मिश्राले ३० रन जोडे ।
पूर्वाञ्चलका जोसक खड्काले ३ विकेट लिए भने अलराउण्ड खेलाडी मन्जित श्रेष्ठले २ विकेट लिए । प्रतियोगिताको म्यान अफ दी फाइनल र बेस्ट बलर पूर्वाञ्चलका जोसक खड्का घोषित भए । बेस्ट ब्याट्समेन कानपुरका हर्षिद सिंह भए ।
उनले नगद १० हजार रुपैयाँ प्राप्त गरे । म्यान अफ सिरिज पूर्वाञ्चलका मन्जित श्रेष्ठ घोषित भए । उनले नगद १५ हजार पाए । प्रतियोगिताको उदयीमान खेलाडी आयोजक टिमका अजय कुर्मी र निखिल चौधरी घोषित भए ।
प्रतियोगितामा विजेता हुने टिमहरूलाई कार्यक्रमका प्रमुख अतिथि प्रदेश १ का उद्योग, श्रम तथा रोजगार मन्त्री प्रतापप्रकाश हाङ्गाम, विराटनगर–१६ का वडाध्यक्ष मनोज सुब्बा, आयोजक समितिका अध्यक्ष मुरली चौधरीलगायतले ट्रफी तथा प्रमाण–पत्र वितरण गरेका थिए ।
