धरान । हाम्रो धरान भेट्रान फुटबल प्रतियोगितामा लेटाङ भेट्रान लेटाङले विजयी सुरुवात गरेको छ ।
धरान रंगशालामा शनिबारदेखि सुरु भएको प्रतियोगितामा लेटाङले मिल्स भेट्रान विराटनगरलाई ३–२ गोल अन्तरले पराजित गर्दै क्वार्टरफाइलनमा प्रवेश गरेको हो । लेटाङका प्रकाश थापाले २ गोल गर्दा भुवनसिंह राईले एक गोल गरे भने मिल्सका विजयकुमार भुजेल र प्रकाशचन्द्र राईले गोल गरे । खेलको म्यान अफ द म्याच लेटाङका बिमल गुरुङ घोषित हुँदै नगद १५ सय रुपैयाँ पाए ।
दोस्रो खेलमा जनता भेट्रान इटहरीलाई १–० गोलले हराउँदै दुधे भेट्रान झापा क्वार्टर फाइनलमा प्रवेश गरेको छ । दुधेका भीम सिटौलाले निर्णायक गोल गरे । खेलको म्यान अफ द म्याच दुधेका मनोज नाल्बो घोषित हुँदै नगद १५ सय रुपैयाँ पाए ।
आइतबारको पहिलो खेल आयोजक हाम्रो धरान भेट्रान र डाडाबजार भेट्रान बीच हुँदै छ भने दोस्रो खेल दमक लखनपुर भेट्रान र भरौल भेट्रानबीच हुने आयोजकले जनाएको छ । प्रतियोगिताको विजेतालाई नगद ८० हजार र उपविजेतालाई नगद ४० हजार प्रदान गरिने आयोजकले जनाएको छ ।
