धरानमा होलिल्याण्ड कप पुरुष ‘फुलसेट’ र महिला ‘थ्रीबाइथ्री बास्केटबल प्रतियोगिता आयोजना गरिने भएको छ ।
असार २२, २३ र २४ गते धरान १५ स्थित होलिल्याण्ड स्कुलको खेलमैदानमा आयोजना हुने प्रतियोगिताको पुरुषतर्फको विजेताले नगद १० हजार रुपैयाँ, ट्रफी मेडल र प्रमाणपत्र प्राप्त गर्नेछन् भने उपविजेताले ५ हजार रुपैयाँसहित ट्रफी मेडल र प्रमाणपत्र प्राप्त गर्नेछन् ।
महिलातर्फ विजेताले नगद ८ हजार रुपैयाँ प्राप्त गर्नेछन् भने उपविजेताले ४ हजार रुपैयाँ प्राप्त गर्नेछन् । प्रतियोगिताका 'मोस्ट भ्यालुएवल प्लेयर', 'राइजिङ प्लेयर' साथै प्रत्येक खेलका 'म्यान अफ दी म्याच'ले मेडल र प्रमाणपत्र प्राप्त गर्नेछन् ।
२२ टिमको सहभागिता रहने प्रतियोगितामा कक्षा ८ देखि एसईई दिएर बसेका विद्यार्थीले सहभागिता जनाउने छन् ।
बुधबार पत्रकार महासंघ सुनसरी शाखामा पत्रकार सम्मेलन गर्दै होलिल्याण्ड स्कुलका प्रिन्सिपल राजकुमार लिम्बूले प्रतियोगिताको प्राविधिक सहयोग हराइजन क्लबले गर्ने बताए ।
