प्रतिनिधिसभामा साउन १० देखि अवरोध गरिरहेको प्रमुख प्रतिपक्षी दल नेकपा (एमाले) ले बिहीबार दिउँसो १ बजेका लागि बोलाइएको राष्ट्रिय सभाको बैठकमा पनि अवरोध गरेरको छ ।
एमालेका सांसदहरुले उठेर निरन्तर विरोध गरिरहेपछि राष्ट्रियसभाका अध्यक्ष गणेशप्रसाद तिमल्सिनाले अवरोध हटाउन भनेका थिए ।
तर एमालेका सांसदहरुले विरोधबाट पछि नहट्ने अडान लिए। त्यसपछि राष्ट्रिय सभा अध्यक्ष तिमल्सिनाले साउन २२ गतेसम्मलाई बैठक स्थगित गरेका छन् ।
बैठकको सुरुमा बोल्दै एमाले सांसद भैरवसुन्दर श्रेष्ठले गत साउन ३ गते त्रिभुवन विमानस्थल बाहिरबाट बरामद भएको एक क्विन्टल सुन तस्करी प्रकरणमा उच्चस्तरीय छानबिन समिति बनाइनुपर्ने माग राखे ।
श्रेष्ठले यो प्रकरणमा जोसुकै संलग्न भए पनि उनीहरुलाई कानुनी दायरामा ल्याउने गरी उच्चस्तरीय छानबिन समिति बनाउन सरकार तयार नभएपछि अवरोधमा उत्रिनुपरेको बताए ।
प्रधानमन्त्री पुष्पकमल दाहाल प्रचण्ड र गृहमन्त्री नारायणकाजी श्रेष्ठले पनि कसैको कुरा नसुनी भ्रष्टाचारको फाइल खोल्ने भनिहरेका बेला माओवादी नेताहरु जोडिएका सुन तस्करी प्रकरणलाई ढाकछोप कोसिस श्रेष्ठको भनाइ थियो ।
क्विन्टल सुन तस्करी प्रकरणमा सरकारले उच्चस्तरीय छानबिन समिति नबनाएपछि राष्ट्रिय सभाको बैठक चल्न नदिने निर्णय भएको श्रेष्ठले बताए । सांसद श्रेष्ठले साउन ३ गते भएको सुन तस्करी प्रकरणमा रेडी ट्रेड प्रालि नामको कम्पनीलाई सेटिङकै सामान आयात गर्न अनुमति दिइएको बताए ।
रेडी ट्रेड प्रालिले पानी तान्ने मेसिनबाट पनि सुन ल्याएको बताए । उनले साउन ३ गते बरामद सुन ब्रेक–शुको नाममा आएको बताउँदै यसमा सरकारका मान्छेको मिलेमतो रहेको बताए ।
