धरान । न्यू भिजन ओपन स्काउट क्र्युले शनिबार धरानमा विश्व शान्ति दिवसको अवसरमा सर्वधर्म सभा आयोजना गरेको छ ।
प्रभातफेरी कार्यक्रमपश्चात् सर्वधर्म सभा आयोजना गरिएको क्र्युका सदस्य–सचिव बब्लुकुमार साहले जानकारी दिए । उनका अनुसार शिक्षा निकेतन विद्यालयबाट सुरु भएको प्रभातफेरी धरान–१२ स्थित एम्स एकेडेमीमा पुगेर टुङ्गिएको थियो ।
एम्स एकेडेमी परिसरमा सबै धर्मका चिह्नहरू बनाएर विश्व शान्तिको कामना गर्दै सबै धर्मको प्रार्थना गरेका थिए । नेपाल स्काउट धरान नगर तदर्थ समितिको सहयोगमा आयोजित प्रार्थना सभामा धरान उपमहानगरपालिकाका उपप्रमुख एवम् स्काउटका नगरप्रमुख अइन्द्रविक्रम बेघाको उपस्थिति रहेको थियो ।
त्यस्तै नेपाल स्काउट कोशी प्रदेश तदर्थ समितिका संयोजक रवि खनाल, धरान–४ का वडाध्यक्ष धनबहादुर राई, किरात राई यायोक्खा सुनसरीका अध्यक्ष राजेन्द्र राई, नेपाल स्काउट कोशी प्रदेश सदस्य हेमन्त भण्डारी, म्यासेन्जर अफ पिसका प्रदेश संयोजक सन्तोष घिमिरे, बेलबारी नगर संयोजक बादल देवान, स्काउट धरान नगर संयोजक अनुप तामाङलगायतको उपस्थितिमा सर्वधर्म सभा गरिएको हो ।
