पक्राउ परेका पहिचानवादी नेताहरुलाई बिना सर्त रिहाइ गर्ने सहमतिपछि घोषित धनकुटा बन्द खुलेको छ ।
असोज २५ गते बिहीबार धनकुटाको राजारानीबाट पक्राउ परेका तीनजना पहिचानवादीलाई पक्राउ गरिएको विरोधमा आज मंगलबारदेखि धनकुटा अनिश्चितकालीन बन्दको घोषणा गरिएको थियो ।
धनकुटाका पहिचानवादी नेताहरु मनकुमार याम्फू राई, बुलन चेम्जोङ लिम्बू र सानु लिम्बूलाई प्रशासनले नियन्त्रणमा लिएको थियो । उनीहरु ५ दिनदेखि जिल्ला प्रहरी कार्यालय धनकुटाको हिरासतमा रहेका थिए । धनकुटाको चौबिसेमा एमालेको भातृ संगठन राष्ट्रिय युवा संघको कार्यक्रम अवरोध गरेको उनीहरुमाथि लगाइएको थियो ।
तर, सोमबार प्रजिअ पौडेलले पहिचानवदीलाई नछाडेपछि अनिश्चितकालीन धनकुटा बन्दको घोषणा गरेको संघर्ष समितिका केन्द्रीय सचिवालय सदस्य कृष्ण चोङवाङले बताए ।
हिजो जिल्ला प्रशासन कार्यालयको मूलगेटमा आयोजित धनकुटा बन्द घोषणा कोणसभा पछि स्थानीय प्रशासनविरुद्ध आन्दोलनकारीले नाराबाजी गरेका थिए । उनीहरुले धनकुटा बजारको विभिन्न भागमा नाराबाजी गर्दै मदनचोकमा पुगेर कोणसभा गरेका थिए ।
