काठमाडौँ/दक्षिणी इजरायलमा हमास समूहको आक्रमणमा परी मृत्यु भएका १० जना नेपाली विद्यार्थीको शव नेपाल आइपुगेको छ ।
गए राति फ्लाइ दुवइको विमानमार्फत ११ः३० बजे डोटी लामीखाल ८ का पदमथापाको शव नेपाल आइपुगेसँगै मृत्यु भएका सबै नेपाली विद्यार्थीको शव नेपाल आइपुगेको परराष्ट्र मन्त्रालयका सहसचिव शरदराज आरणले बताएका छन ।
उनले भने “इजरायलमा हमास समूहको आक्रमणमा परी मृत्यु भएका १० विद्यार्थीको शव नेपाल ल्याइएको छ। इजरायलमा हाललाई उद्धार कार्य करिब करिब सकिएको छ । बेपत्ता भएका विपीन जोशीको उद्धारका लागि पहल भइरहेको छ ।”
दक्षिणी इजरायलमा गत असोज २० गते अर्थात अक्टोबर ७ मा हमास समूहको आक्रमणमा परी १० जना नेपाली विद्यार्थीको मृत्यु भएको थियो । आक्रमणमा परि डोटी लामीखाल वडा नम्बर – ८ का पदम थापा,सल्यान सारदाल वडा नम्बर – ३ का प्रवेश भण्डारी, बझाङ जयपृथ्वी वडा नम्बर – ६ का गणेशकुमार नेपाली, दार्चुला मालिकार्जन वडा नम्बर – ४ का लोकेन्द्रसिंह धामी, दार्चुला लेकम वडा नम्बर –५ का दीपेशराज विष्ट, धनुषा सापही वडा नम्बर – ६ का आनन्द शाह, कैलाली घोडाघोडी वडा नम्बर –४ का नारायणप्रसाद न्यौपाने, सुनसरी मधुवन वडा नम्बर –१ का राजेशकुमार स्वर्णकार, डोटी पचनाली वडा नम्बर –३ का राजन फुलारा, तथा कैलाली बौनियाँ वडा नम्बर –३ का आशीष चौधरीको शव नेपाल ल्याइएको हो ।
सुदूरपश्चिम विश्वविद्यालयको कृषि क्षेत्रको ‘लर्न एण्ड अर्न’ कार्यक्रमअन्तर्गत उनीहरु इजरायल गएका थिए। सोही आक्रमणमा परी कञ्चनपुर भीमदत्त(३ का विपीन जोशी सम्पर्कविहीन छन्। केही समय अघि परराष्ट्रमन्त्री नारायणप्रकाश साउदसहितको टोलीले इजरायलमा फसेका दुई सय ५४ विद्यार्थीलाई उद्दार गरी नेपाल ल्याएको थियो ।
डोटी लामीखाल वडा नम्बर वडा नम्बर – ८ का पदम थापा, डोटी पचनाली वडा नम्बर–३ का राजन फुलारा र सल्यान सारदा वडा नम्बर–३ का प्रवेश भण्डारीको शव आज दिउँसो १२ बजेपछि नेपाली सेनाको हेलिकोप्टरमार्फत सम्बन्धित जिल्लामा पठाइने तयारी भएको सहसचिव आरणले जानकारी दिएका छन्।
