पाँचथर । मेची राजमार्गको पाँचथर खण्ड अन्तर्गत हिलिहाङ–७, टाहारीमा मंगलबार पिकअपबाट खसेर एक ब्यक्तिको मृत्यु भएको छ । मृत्यु हुनेमा फक्ताङलुङ गाउँपालिका–२, ताप्लेजुङ बस्ने ४३ बर्षिय भक्तबहादुर लिम्बू रहेको प्रहरीले जनाएको छ ।
मलेशियामा मृत्यु भएका आफ्ना भाईको शव ल्याउँने क्रममा उनको पनि पिकअपबाट खसेर मृत्यु भएको हो । वैदेशिक रोजगारीको शिलशिलामा मलेसिया पुगेका भक्तका भाई देवी प्रसाद लिम्बूको मलेसियामै मृत्यु भएको थियो । उनको शव नेपाल झिकाई काठमाण्डौंबाट बा १७ च ८४५१ नम्बरको पिकअप रिजर्भ गरी ताप्लेजुङतर्फ लैजाने क्रममा पाँचथरको टाहारीमा पुग्दा भक्त अचानक झ्याल खोलिएर खसेका हुन् ।
सख्त घाईते भएका उनलाई उपचारको लागि पाँचथर अस्पताल ल्याउँने क्रममा बाटोमै मृत्यु भएको पाँचथर प्रहरीले जनाएको छ । घटनाबारे थप अनुसन्धान भइरहेको जिल्ला प्रहरी कार्यालय पाँचथरका प्रमुख डिएसपी बामदेव गौतमले बताए ।
