बेलबारी । मोरङको बेलबारी नगरपालिका–३ निवासी पेरिस सुवेदीले आफ्नो जन्मदिनको अवसरमा बेलबारी–१ मा रहेको शहीद स्मृति प्राविका विद्यार्थीहरुलाई सोमबार शैक्षिक सामग्री वितरण गरेका छन् । जन्मदिनमा हुने फजुल खर्च कटाएर विद्यार्थीहरुलाई शैक्षिक सामग्री वितरण गरेका हुन् । विद्यालयका ५५ जना विद्यार्थीहरुलाई खाजा खुवाएर कापी वितरण गर्दै उनले आफ्नो १८ औँ वार्षिकोत्सव मनाएका हुन् । विद्यालयमा शैक्षिक सामग्री वितरण कार्यक्रम राखेर उनले आफ्नो जन्मदिन मनाए । विभिन्न सामाजिक गतिविधिहरुमा क्रियाशील सुवेदी मिष्टर एसएलसीको विजेता पनि हुन् । लायन्स लगायतका संस्थाहरुमा आबद्ध भएर उनी विराटनगरमा क्रियाशील छन् भने विभिन्न सामाजिक सङ्घ–संस्थाहरुरुमा आबद्ध भएर उनी समाजसेवा गरिरहेका छन् । जन्मदिनको अवसरमा आयोजित शैक्षिक सामग्री हस्तान्तरण कार्यक्रममा बेलबारी जेसिजका अध्यक्ष राजन प्रसाईले उनको यो सकारात्मक कामबाट अरुले पनि सिक्नुपर्ने र फजुल खर्च कटाएर यसैगरी उत्प्रेरक काम गर्नुपर्ने बताए । कार्यक्रममा सामाजिक अभियन्ता सुमी थापालगायतले उनको कामबाट अरुले पनि सिक्नु जरुरी रहेको बताए । कार्यक्रम विद्यालयका संस्थापक अध्यक्ष भक्तशेर लिम्बूको सञ्चालन र प्रधानाध्यापक मोती सिन्चौरीको सभापतित्वमा सम्पन्न भएको थियो ।
